გასულ წელს სამინისტროს ნაერთი ბიუჯეტი შეადგენდა 61 255 000 ლარს, შესრულებამ შეადგინა 99,5 %. 2025 წლისთვის ბიუჯეტი მნიშვნელოვნად – 23.9%-ით გაზარდა, რაც 80,500,000 ლარს შეადგენს. სამინისტრო საქვეუწყებო დაწესებულებებთან ერთად ახორციელებს 38 პროგრამას. 2024 წელს და 2025 წლის I კვარტლის პერიოდში სამინისტროს პროგრამებით ისარგებლა 90 946 მოქალაქემ, გამოიყო 128 013 631 ლარი.

"აჭარის ჯანმრთელობისა და სოციალური დაცვის სამინისტრომ ბიუჯეტის ზრდის ფონზე რეგიონში დაიწყო რამდენიმე მნიშვნელოვანი ინიციატივის განხორციელება, რომლებიც ჯანდაცვის ხარისხისა და ხელმისაწვდომობის გაუმჯობესებას ისახავს მიზნად", - განაცხადა მინისტრმა, ნინო ნიჟარაძემ.

ჯანდაცვის მიმართულებით დაიწყო ფილტვის ტრანსპლანტაციის დაფინანსება, გულის მძიმე პათოლოგიების მქონე პაციენტებისთვის გულის სარქვლის ტრანსკათეტერული იმპლანტაციის (TAVI) დაფინანსება. აღნიშნული პროცედურა არის ნაკლებად ინვაზიური და კრიტიკულად მნიშვნელოვანია მაღალი რისკის პაციენტებისთვის. ონკოლოგიური დიაგნოზის მქონე პაციენტების მხარდასაჭერად გაიზარდა -თარგენტული, იმუნოთერაპიული, ბისფოსფონატების ჯგუფის მედიკამენტების წლიური ლიმიტი 70,000 ლარამდე.

ნინო ნიჟარაძის განცხადებით, სამინისტრომ დაიწყო 2026 წლის პროგრამებზე მუშაობა. გაგრძელდება მიმდინარე წელს არსებული პროგრამები, დაგეგმილია მათში რიგი ცვლილებების განხორციელება, გაიზრდება ბენეფიციართა რაოდენობა, სამინისტროს მხრიდან დაფინანსების წილი, ამოქმედდება ახალი პროგრამები.