საზღვაო სფეროში დასაქმების ხელშეწყობა
19 მარტი, 2025
აჭარის დასაქმების სააგენტოს „საზღვაო სფეროში დასაქმების ხელშეწყობის“ პროგრამის შედეგების შემაჯამებელი ღონისძიება და მსმენელთა სერტიფიკატებით დაჯილდოება გაიმართა.
ღონისძიებას აჭარის ჯანდაცვის მინისტრის მოადგილე, ილია ვერძაძე, უმაღლლესი საბჭოს, ადგილობრივი თვითმმართველობისა და აჭარის განათლების სამინისტროს წარმომადგენლებთან ერთად დაესწრო.
პროგრამის მიზანია, ქართული სამუშაო ძალისთვის ახალი შესაძლებლობების შექმნა საზღვაო ინდუსტრიაში, კერძოდ სამგზავრო გემებზე. მიმტანისა და ბართენდერის
პროფესიული სწავლება განხორციელდა წამყვანი სპეციალისტების მიერ, საერთაშორისო მოთხოვნების შესაბამისად შემუშავებული სპეციალური
მოკლევადიანი კურსით, რომელიც მოიცავდა:
პროფესიული მიმართულებით სასწავლო თეორიულ და პრაქტიკულ კურსს;
უცხო ენის ცოდნის დონის განვითარებასთან ერთად, პროფესიული კომპეტენციების გაღრმავებას დარგობრივი ტერმინოლოგიის შესწავლით;
საწარმოო პრაქტიკას რეალურ სამუშაო გარემოში;
საზღვაო საწვრთნელ მასერტიფიცირებელ ტრენინგ კურსს STCW კონვენციისა და IMO მოდელ კურსების მოთხოვნების შესაბამისად.
როგორც შეხვედრაზე სააგენტოს ხელმძღვანელმა, თეიმურაზ კახიძემ აღნიშნა, პროექტი მესამე წელია წარმატებით ხორციელდება, რაც გამოიხატება საერთაშორისო კომპანიების დაინტერესებაში და სააგენტოს მიერ გადამზადებული კადრების დასაქმებაში.
კურსდამთავრებულებს გადაეცათ ორენოვანი სერტიფიკატები, რაც მათთვის საზღვაო ინდუსტრიაში ახალი კარიერული შესაძლებლობების შექმნის წინაპირობა იქნება.
იხილეთ გალერეა